Алт эрдэнэс хайгчид АНУ-ын Флорида мужийн өмнөд эрэг орчмын арлууд хавиас 17-р зууны үеийн алтан бөгж олсон тухай рамблер.ру мэдээлэв. Энэ бөгж 10 каратын маргад эрдэнийн шигтгээтэй бөгөөд хагас сая ам.доллараар үнэлэгдлээ.

1622 онд хар салхины улмаас живсэн Испанийн Nuestra Senora de Atocha хөлөг онгоцны живсэн гзарт малтлага хийх үед бөгж олджээ. Мөн шумбагчид хоёр мөнгөн халбага олсон аж. Алт, үнэт эдлэл болон мөнгөн цутгамал ачиж явсан Nuestra Senora de Atocha хөлөг онгоцны сүйрэл олон зуун жилийн турш адал явдал, алт эрдэнэс хайгчдын анхаарлыг татаж байсан юм. 1985 онд нэгэн алт эрдэнэс хайгч 16 жилийн хайгуулын эцэст хөлөг онгоцны живсэн газрыг тодорхойлж чадсан. Тэр үеэс одоог хүртэл 450 сая ам.долларын үнэ бүхий алт эрдэнэсийг далайн ёроолоос гаргаж аваад байгаа юм.